Իսպանիան ֆրանսիացի ճանապարհորդներից կորոնավիրուսի թեստի բացասական պատասխանի մասին տեղեկանքներ կպահանջի

Իսպանիան Ֆրանսիայից ցամաքով ժամանող ճանապարհորդներից COVID-19-ի թեստի բացասական պատասխանի մասին տեղեկանքներ կպահանջի, շաբաթ օրը հայտնել է առողջապահության նախարարությունը՝ ֆրանսիացիների ժամանումների աճի եւ Իսպանիայում կորոնավիրուսի մակարդակի բարձրացման ֆոնին, հաղորդում է Reuters-ը:

Ցանկացած մարդ, ով ցամաքային տրանսպորտով ժամանում է ռիսկային գոտիներից, պարտավոր է ներկայացնել ՊՇՌ թեստի բացասական պատասխան, որն արվել է ժամանումից առաջ 72 ժամվա ընթացքում:

«Հրամանը ուժի մեջ կմտնի պետական պաշտոնական թերթում հրապարակվելուց երեք օր անց եւ մինչեւ այն ժամանակը, քանի դեռ կառավարությունը չի հայտարարի առողջապահական ոլորտում COVID-19-ի պատճառած ճգնաժամի ավարտի մասին»,- ասված է առողջապահության նախարարության հայտարարության մեջ:

Նոր պահանջը չի տարածվի բեռնատարների վարորդների, սահմանամերձ աշխատողների եւ այն մարդկանց վրա, ովքեր ապրում են սահմանից 30 կիլոմետր հեռավորությամբ:

Բազմաթիվ ֆրանսիացիներ, ովքեր հոգնել են իրենց մեկուսացումից, գալիս են Իսպանիա, որպեսզի վայելեն բացօթյա բարերն ու ռեստորանները այնպիսի տարածքներում, ինչպիսին Մադրիդն է:

Սակայն Իսպանիայում կորոնավիրուսի վարակի տարածման տեմպերը վերջին շաբաթվա ընթացքում անշեղորեն աճել են, ինչը թույլ է տալիս ենթադրել, որ երկարատեւ անկումը կարող է սպառնալիքի տակ հայտնվել:

Առողջապահության նախարարությունից հայտնել են, որ նախորդ 14 օրվա ցուցանիշը բարձրացել է՝ ուրբաթ օրը հասնելով 138,6-ի՝ 100 000 պացիենտով ավելի հինգշաբթի օրվա 134-ի դիմաց: Գերատեսչությունը հաղորդել է 7586 նոր դեպքի մասին, ինչի հետեւանքով Իսպանիայում դեպքերի ընդհանուր թիվը հասել է 3,26 միլիոնի: Մահացածների թիվն աճել է 590-ով՝ հասնելով 75 010-ի: