[ad_1]
Ֆիլիպինների պաշտպանական գերատեսչության ղեկավարը պահանջել է, որ աշխարհազորայիններով լցված չինական 200 նավերը լքեն հարավչինական ծովի այն տարածքը, որի նկատմամբ հավակնություններ ունի նաև Մանիլան և նշել է, որ դրանց ներկայությունը «տարածքի ռազմականացման սադրիչ ակցիա է»: Այս մասին գրում է The Guardian պարբերականը:
«Մենք չինացիներին կոչ ենք անում դադարեցնել այս ներխուժումը և անհապաղ հետ կանչել այդ նավերը, որոնք ոտնահարում են մեր ծովային իրավունքները և ոտնձգություն կատարում մեր ինքնիշխան տարածքի վրա», — հայտարարության մեջ ասել է պաշտպանության նախարար Դելֆին Լորենցան՝ առանց մանրամասնելու, որ Ֆիլիպինները կպահպանի իր ինքնիշխան իրավունքները:
Վիճելի տարածաշրջանը վերահսկող կառավարական հսկիչ մարմինը հայտնել է, որ մարտի 7-ին շուրջ 220 չինական նավ է նկատել Ուիցունի խութում, որի նկատմամբ Պեկինը նույնպես հավակնություններ ունի:
Արտաքին գործերի նախարար Թեոդորո Լոկսինը կիրակի ուշ երեկոյան հայտնել է, որ Ֆիլիպինները դիվանագիտական բողոք են հայտնել չինացիների ներկայության կապակցությամբ:
Խութը, որը Մանիլան անվանում է Ջուլիան Ֆելիպե, բումերանգի ձևով տարածք է, որը գտնվում է Ֆիլիպինների Պալավան նահանգի արևմտյան Բաթարազա քաղաքից 175 ծովային մղոն (324 կմ) դեպի արևմուտք: Այն գտնվում է երկրի բացառիկ տնտեսական գոտու սահմաններում, ինչի շնորհիվ Ֆիլիպինները «օգտվում է բացառիկ իրավունքից ՝ շահագործելու կամ պահպանելու ցանկացած ռեսուրս»,-նշել են կառավարության հսկիչ մարմնում: